NGALARAPKEUN TITIK KOMA

Basa Sundana mah koma peun, tapi dina ieu pedaran urang paké istilah titik koma baé nya.

1. Titik koma dipaké pikeun gaganti kecap panyambung anu misahkeun kalimah satata jeung kalimah satata lianna dina kalimah sélér-sumélér (kalimat majemuk).
Contona:

- Bapa beberesih di buruan; Ema masak di dapur.
- Kuring balik ti sakola; Téh Ijem keur maca buku; Si Adé keur momobilan.

Kalimah di luhur upama maké kecap panyambung bisa jadi kieu:

- Bapa beberesih di buruan, ari Ema masak di dapur.
- Basa kuring balik ti sakola, Téh Ijem keur maca buku, ari Si Adé keur momobilan.

2. Titik koma dipaké wincikan dina kalimah anu geus ngagunakeun koma (,) pikeun ngabédakeun jenis (hal) anu béda.
Contona:

- Kamari kuring ka pasar meuli daging sapi, engkol, wortel, jeung tomat; buku tulis, pulpén, jeung patlot gambar.
- Édod balik ti Wanayasa mawa manggu, pala, jeung cau; kuéh pandan, saté maranggi, jeung beuleum ketan.

3. Titik koma dipaké dina wincikan anu mangrupa klausa.
Contona:

Sarat-sarat jadi Kepala Désa Cibulakan nya éta
(1) warga nagara Indonésia;
(2) padumuk Désa Cibulakan, dibuktikeun ku KTP;
(3) sakurang-kurangna lulusan SMA/sadarajat;
(4) séhat jasmani jeung rohani;
(5) geus boga hak milih jeung dipilih.

Tengetan cara nuliskeunana! Unggal wincikan dimimitian ku aksara leutik, ditungtungan ku titik koma.
Conto séjénna:

Agénda rapat ayeuna téh
a. milih pupuhu, girang serat, jeung bendahara;
b. nyusun anggaran dasar, anggaran rumah tangga, jeung program gawé; sarta
c. ngadata anggota, dokuméntasi, jeung asét organisasi.

Poto: Tangkal manggu leubeut buahna.