CARA NULISKEUN WINCIKAN DINA KALIMAH

Cara nuliskeun wincikan dina kalimah. Kawas anu teu pira, tapi loba anu salah nuliskeunana, hartina henteu luyu jeung éjahan, boh basa Sunda boh basa Indonésia; da geuning dina soal éjahan mah loba anu saruana, kaasup dina soal nuliskeun wincikan. Urang pedar conto larapna dina kalimahna.

1. Di pasar téh kuring meuli daging sapi, engkol, wortel, jeung tomat.

Anu sok salah nuliskeunana téh bagian panungtung, lebah “wortel jeung tomat”. Lamun wincikanana dua mah teu kudu maké koma (,), ku lantaran ieu mah leuwih ti dua, kudu dipisahkun ku koma saperti conto di luhur.

Conto anu wincikanana dua:
- Di pasar téh kuring meuli wortel jeung tomat.
- Di pasar téh kuring bingung, rék meuli wortel atawa tomat.

Béda jeung kalimah di handap:
- Di pasar téh kuring bingung, rék meuli engkol, wortel, atawa tomat.
Antara “wortel atawa tomat”, mun wincikanana leuwih ti dua kudu dipisahkeun ku koma (,).

2. Di pasar téh kuring meuli daging sapi, engkol, wortel, tomat, jsb.
Dina bagian panungtung antara “tomat jeung jsb.” ogé kudu dipisahkeun ku koma (,). Ari jsb. téh wancahan tina “jeung sajabana”. Kitu deui jeung wancahan jrrd. (jeung réa-réa deui), jsté. (jeung salian ti éta).

3. Di pasar téh kuring meuli sopeun: daging sapi, engkol, wortel, jeung tomat.
Dina kalimah di luhur mah méméh wincikan téh dipisahkeun ku titik dua ( : ), sabab aya anu kudu diwincik tina sopeun sarta adegan kalimahna geus dianggap réngsé nepi kana kecap “sopeun”.

Conto séjénna:
- Anu miluan rampak sekar aya ogé barudak kelas dua: Édod, Cioh, jeung Ijem.
- Kamari Ceu Imot meuli parabot dapur: katél, panci, langseng, jeung sinduk.
- Keur urang mah tinggal dua pilihan: meunang atawa éléh.

4. Anu kaasup kana sayuran téh di antarana engkol, wortel, tomat, jeung bonténg.
Lamun geus ngagunakeun kecap "di antarana" dina tungtung wincikanana henteu kudu maké deui jsb. (jeung sajabana), jrrd. (jeung réa-réa deui), atawa jsté. (jeung salian ti éta). Apan geus disebutkeun “di antarana”, hartina henteu perlu kabéh disebutkeun sarta diémbohan katerangan jeung sajabana. Kitu deui lamun geus maké kecap “contona”, “upamana”, “saperti”, “misalna”, atawa “kayaning” anu sarua hartina jeung “saperti”.

Conto anu bener nulisna:
- Loba hasil tatanén anu diimpor ti nagara deungeun, contona mah béas, sampeu, jeung kadelé.
- Loba kasenian Sunda anu geus tinggal ngaranna, upamana baé ogél, longsér, jeung buncis.

Foto engkol nu meujeuhna ligar