NULISKEUN KECAP SULUR

Kecap sulur téh kecap anu dipaké gaganti kecap barang (nomina), sok disebut ogé pronomina. Keun sual téorina mah nya, urang guar sa deui. Ayeuna mah urang medar cara nuliskeunana baé.
Kecap gaganti ngaran aya sababaraha golongan, di antarana:
1. Kecap gaganti ngaran jalma kahiji: abdi, kuring, déwék, aing, uing, kaula, kula, di dieu, kami, urang.
2. Kecap gaganti ngaran jalma kadua: anjeun, manéh, sia, silaing, hidep, andika, énté, salira.
3. Kecap gaganti ngaran jalma katilu: anjeunna, manéhna, inyana, mantenna.
Anu disebutan di luhur téh kecap gaganti ngaran tunggal, aya deui kecap gaganti ngaran lobaan (jama), di antarana: abdi sadayana, urang (saréréa), kuring saparakanca, aranjeun, maranéh, hidep saréréa, aranjeunna, maranéhna.
Nuliskeunana dimimitian ku aksara leutik, iwal anu ditujulkeun ka Gusti Alloh. Upama anu dipiheulaan ku partikel saperti sim (jisim), pun, tuang, si, sang, sakadang; nulisna dipisahkeun. Contona:
- sim kuring, jisim kuring
- pun biang, pun bapa, pun anak, pun lanceuk
- tuang ibu, tuang putra, tuang rama, tuang raka
- si geulis, si manis, si kasép, si baju beureum
- sang bango, sang raja
- sakadang kuya, sakadang monyét
Tadi disebutkeun kecap gaganti ngaran anu ditujulkeun ka Gusti Alloh mah, dimimitian ku aksara gedé. Contona:
- Anjeunna.
- Mantenna.
Aya anu sok nuliskeun “anjeun-Na” atawa “manten-Na”. Éta salah, kawasna mah niron tina basa Indonésia “kepada-Nya”. Jelas béda, dina basa Sunda mah, anu bener nulisna “ka Anjeunna” atawa “ka Mantenna”. Apan “Anjeunna” jeung “Mantenna” téh sasaruanana “Dia”. Ari “kepada-Nya” sarua jeung “kepada Dia”.
Sangkan leuwih teleb mah, pék geura larapkeun kana kalimah.

Poto: si baju beureum.