NULISKEUN KECAP RUNDAYAN

Kecap rundayan téh nya éta kecap anu wangun dasarna geus dirarangkénan. Ari rarangkén ngawengku rarangkén hareup, rarangkén tengah, rarangkén tukang, rarangkén gabung, jeung rarangkén barung. Aya sawatara palanggeran dina nuliskeunana, di antarana:

1. Rarangkén ditulis ngantét jeung wangun dasarna.
Contona:
- barempug
- kabawa
- dijual
- dibaraeudan
- padaneunggeul
- silihasih
- silihkiceupan
- barangbawa
- patingjelegur
- pibekeleun
- pikaresepeun
- pangdipikanyaahna

2. Upama wangun dasarna kecap kantétan anu nulisna dipisahkeun, angger nulisna dipisahkeun lamun dirarangkénan ku rarangkén hareup wungkul atawa rarangkén tukang wungkul.
Contona:
- dijual dedet
- ngarujak bebek
- tanggung jawabna
- adu maniskeun

3. Upama wangun dasarna kecap kantétan anu sakaligus dirarangkénan ku rarangkén hareup jeung rarangkén tukang (rarangkén gabung atawa rarangkén barung), éta kecap kantétan téh nulisna dihijikeun.
Contona:
- diadumaniskeun
- dijualdedetkeun
- pibapatéréeun
- dipatumpangtindihkeun
- disakompétdaunkeun
- panggedéhuluna

4. Upama wangun dasarna kecap kantétan anu diwangun ku tilu kecap atawa leuwih; atawa ngaran macakal, sarta sakaligus meunang rarangkén hareup jeung rarangkén tukang, éta kecap kantétan téh nulisna maké geret (-).
Contona:
- dikana-lomari-susun-anyarkeun
- pangluhur-kuta-gedé-dunyana
- dika-Bandung-Baratkeun
- dika-Rumah-Sakit-Hasan-Sadikinkeun
- dika-Mang-Atmajakeun

Poto: Silihasih di basisir.